-ஒருவரின் தலை மற்றும் கழுத்துப் பகுதியில் ஏற்பட்டுள்ள அறிகுறிகள் அல்லது அடையாளங்களின் காரணத்தை அறிவதற்கு, மருத்துவர் அந்த நபரின் மருத்துவச் சரித்திரத்தை மதிப்பிட்டு, ஓர் உடற் பரிசோதனையை மேற்கொண்டு, நோய்க்குறிப் பரிசோதனைகளை செய்யுமாறு பணிக்கிறார்.

-அறிகுறிகளைப் பொறுத்து பரிசோதனைகளும் சோதனைகளும் மாறுபடலாம்.

-ஒரு புற்றுநோய்க்கு நோய்க்குறி அறிதலை உறுதிசெய்வதற்காக எப்போதும் ஒரு திசு மாதிரியை நுண்ணோக்கியில் பரிசோதிப்பது அவசியமாகும்.

-வாய்ப் புற்றுநோய் இருக்கலாம் எனச் சுட்டும் அறிகுறிகள் உங்களுக்கு ஏற்பட்டால், உங்கள் மருத்துவர் அல்லது பல் வைத்தியர் உங்கள் வாய் மற்றும் தொண்டையை பரிசோதித்து அங்கு சிவப்பு அல்லது வெள்ளைத் திப்பிகளோ புடைப்புகளோ வீக்கமோ பிற பிரச்சனைகளோ உள்ளனவா எனக் காண்பார்.

-ஓர் உடற் பரிசோதனையில் உங்கள் வாய் முகடும் தொண்டையின் பின்புறமும் கன்னங்கள் மற்றும் உதடுளின் உட்புறங்களும் கவனமாகப் பரிசோதிக்கப்படும்.

-மேலும் உங்கள் நாக்கின் பக்கவாடுகள் மற்றும் அடிப்புறத்தை சோதிப்பதற்காகவும் அதை உங்கள் மருத்துவர் அல்லது பல் வைத்தியர் மிதமாக வெளியே இழுப்பார். மேலும், உங்கள் வாய் முகடும் கழுத்திலுள்ள நிணநீர்க் கணுக்களும் பரிசோதிக்கப்படும்.

-உங்கள் மருத்துவர் அல்லது பல் வைத்தியரால் உங்களது அறிகுறிகளுக்கான காரணத்தை கண்டறிய இயலாவிட்டால், ஒரு மருத்துவ நிபுணருடன் சந்திப்புக்கு நீங்கள் பரிந்துரைக்கப்படலாம்.

-ஒரு காது-மூக்கு-தொண்டை நிபுணர் ஒரு சிறிய, நீளக் கைப்பிடி கண்ணாடியை அல்லது ஒரு விளக்கிட்டக் குழலை பயன்படுத்தி உங்கள் மூக்கு, நாக்கு, மற்றும் தொண்டையின் பின்புறத்தை நோக்கமுடியும்.

-சில சமயங்களில் ஓர் ஒளிந்துள்ள புற்றுக்கட்டியை நோக்குவதற்கு சீடீ ஸ்கேன் அல்லது எம்ஆர்ஐ ஸ்கேன் மூலம் படங்களை உருவாக்குவது அவசியம்.

-புற்றுச் செல்கள் உள்ளனவா எனக் காண்பதற்காக ஒரு சிறு திசுத் துண்டை அகற்றியெடுப்பது திசு ஆய்வு(பயாப்சி) எனப்படுகிறது. பிறகு, ஒரு நோயியல் நிபுணர் நுண்ணோக்கி வழியாக அந்த மாதிரியை பார்வையிட்டு புற்றுச் செல்கள் உள்ளனவா எனச் சோதிப்பார். காணப்படும் இயல்பற்ற பகுதி உண்மையில் புற்றுக்கட்டியா என்பதை உறுதியாக அறிவதற்கு திசு ஆய்வு(பயாப்சி) மட்டுமே ஒரே வழி.

-வாய்ப் புற்றுநோய் உள்ளதாக நோய்க்குறி அறியப்பட்டுவிட்டால், அந்நோய் எந்தளவுக்கு வளர்ந்துள்ளது என்பதை உங்கள் மருத்துவர் அறிய வேண்டியிருக்கும்; அதன் மூலம், அவரால் உங்களுக்குரிய மிகச் சிறந்த சிகிச்சையை தெரிவுசெய்ய இயலும்.

-வாய்ப் புற்றுநோய் பரவும்போது, கழுத்திலுள்ள நிணநீர்க் கணுக்களில் அல்லது கழுத்தின் பிற திசுக்களில் புற்று செல்கள் காணப்படலாம். நுரையீரல்கள், ஈரல், எலும்புகள், உடலின் பிற பாகங்கள் ஆகியவற்றுக்கும் புற்றுச் செல்கள் பரவலாம்.

-இந்நோய் குறித்து நிலையறிதல் செய்வதற்கு பின்வரும் ஒன்று அல்லது கூடுதல் பரிசோதனைகளை மேற்கொள்ளுமாறு மருத்துவர் உத்தரவிடலாம்:
-எக்ஸ்-ரே
-சீடீ ஸ்கேன்
-எம்ஆர்ஐ ஸ்கேன்
-எண்டோஸ்கோபி
-பீஈடீ ஸ்கேன்

-எக்ஸ்-ரே: வாய் முழுவதற்கும் எடுக்கப்படும் எக்ஸ்-ரே படத்தின் மூலம், உங்கள் தாடைக்கும் புற்றுநோய் பரவியுள்ளதா என்பதை காணலாம். நெஞ்சு மற்றும் நுரையீரல்களின் படங்கள் மூலம், இந்தப் பகுதிகளுக்கு புற்றுநோய் பரவியுள்ளதா என்பதை காணலாம்.

-சீடீ ஸ்கேன்: ஒரு கணினியுடன் இணைக்கப்பட்டுள்ள ஓர் எக்ஸ்-ரே எந்திரம் உங்கள் உடலின் விரிவான படங்களின் ஒரு வரிசையை உருவாக்குகிறது. உங்களுக்கு ஒரு நிறமி ஊசியும் போடப்படலாம். வாய், தொண்டை, கழுத்து, நுரையீரல்கள், அல்லது உடலின் வேறு பகுதிகளில் உள்ள புற்றுக்கட்டிகள் சீடீ ஸ்கேன் படத்தில் தோன்றும்.

-எம்ஆர்ஐ ஸ்கேன்: உங்கள் உடலின் விரிவான படங்களை உருவாக்குவதற்கு ஒரு கணினியுடன் இணைக்கப்பட்டுள்ள ஒரு சக்திவாய்ந்த காந்தம் பயன்படுத்தப்படுகிறது. வாய்ப் புற்றுநோய் பரவியுள்ளதா என்பதை எம்ஆர்ஐ ஸ்கேன் காண்பிக்கும்.

-எண்டோஸ்கோபி: உங்கள் தொண்டை, மூச்சுக்குழாய் மற்றும் நுரையீரல்களை சோதிப்பதற்கு மருத்துவர் ஒரு மெல்லிய, விளக்கிட்ட குழலை (எண்டோஸ்கோப்) பிரயோகிப்பார். மருத்துவர் எண்டோஸ்கோப் குழலை உங்கள் மூக்கு அல்லது வாய் வழியாக உட்செலுத்துவார்.

-பீஈடீ ஸ்கேன்: இந்த நடைமுறையில் ஒரு சிறிய அளவிலான ரேடியோஆக்டிவ் குளுக்கோஸ் (சர்க்கரை) ஓர் ஊசி வழியாக சிரைக்குள் செலுத்தப்பட்டு, பிறகு உடலில் குளுக்கோஸ் பயன்படுத்தப்படும் பகுதிகளின் விரிவான கணினிப் படங்களை எடுப்பதற்காக ஒரு ஸ்கேனர் பயன்படுத்தப்படுகிறது. இயல்பான செல்களை விட புற்றுச் செல்கள் பெரும்பாலும் அதிகமாக குளுக்கோஸ் பயன்படுத்துவதால், இந்தப் படங்களை பயன்படுத்தி உடலில் புற்றுச் செல்களை கண்டறியலாம்.

வாய்ப் புற்றுநோய் கட்டங்கள்

-புற்றுக்கட்டியின் அளவு, அது அருகாமைத் திசுக்களில் படர்ந்துள்ளதா எனும் விஷயம், அது நிணநீர்க் கணுக்களுக்கு அல்லது பிற திசுக்களுக்கு பரவியுள்ளதா எனும் விஷயம் ஆகியவற்றைப் பொறுத்து வாய்ப் புற்றுநோயின் கட்டத்தை மருத்துவர்கள் சித்தரிக்கின்றனர்.

-ஆரம்பச் கட்ட புற்றுநோய்: கட்டம் I அல்லது II வாய்ப் புற்றுநோய் வழக்கமாக ஒரு சிறிய புற்றுக்கட்டியாகவே இருக்கும்; நிணநீர்க் கணுக்களில் புற்றுச் செல்கள் எதுவும் காணப்படாது.

-முதிர்நிலைப் புற்றுநோய்: கட்டம் III அல்லது IV வாய்ப் புற்றுநோய் வழக்கமாக ஒரு பெரிய புற்றுக்கட்டியாக (எலுமிச்சை அளவுக்கு) இருக்கும். புற்றுக்கட்டி அருகாமை திசுக்களில் படர்ந்திருக்கலாம் அல்லது நிணநீர்த் திசுக்களுக்கோ உடலின் பிற பாகங்களுக்கோ பரவியிருக்கலாம்.

குரல்வளைப் புற்றுநோயை நோய்க்குறி அறிதல்

-உங்களுக்கு குரல்வளைப் புற்றுநோய் உள்ளதாகச் சுட்டும் அறிகுறிகள் இருந்தால், உங்கள் மருத்துவர் ஓர் உடற் பரிசோதனையை மேற்கொள்ளலாம்.

-உங்கள் மருத்துவர் உங்கள் தொண்டையைப் பார்த்தும் உங்கள் கழுத்தைத் தொட்டுணர்ந்தும் புடைப்புகள், வீக்கம், அல்லது பிற பிரச்சனைகள் உள்ளனவா எனக் காண்பார்.

-உங்களுக்கு பின்வரும் பரிசோதனைகளில் ஒன்று அல்லது அதற்கு மேற்பட்டவைகள் செய்யப்படலாம்:
-மறைமுகமான லேரிங்கோஸ்கோபி
-நேரடி லேரிங்கோஸ்கோபி
-திசு ஆய்வு(பயாப்சி)

-மறைமுகமான லேரிங்கோஸ்கோபி
உங்கள் மருத்துவர் ஒரு நீளக் கைப்பிடி கொண்ட சிறிய கண்ணாடியை பயன்படுத்தி உங்கள் தொண்டை மற்றும் குரல்வளையை பார்ப்பார்.
நீங்கள் சில ஒலிகளை எழுப்பும்போது உங்கள் குரல் நாண்கள் இயல்பாக அதிர்வடைகின்றனவா என உங்கள் மருத்துவர் பரிசோதிப்பார்.

-நேரடி லேரிங்கோஸ்கோபி
உங்கள் மருத்துவர் உங்களது தொண்டை மற்றும் குரல்வளையை பார்ப்பதற்காக ஒரு விளக்கிட்ட குழலை (லேரிங்கோஸ்கோப்) பிரயோகிப்பார்.
இந்த விளக்கிட்ட குழல் நெகிழ்வாகவோ விறைப்பாகவோ இருக்கலாம்:
நெகிழ்வான குழல்: உங்கள் மருத்துவர் ஒரு நெகிழ்வான குழலை உங்கள் மூக்கு வழியாக தொண்டைக்குள் செலுத்துவார்.

-விறைப்பான குழல்: உங்கள் மருத்துவர் ஒரு விறைப்பான குழலை உங்கள் வாய் வழியாக தொண்டைக்குள் செலுத்துவார். திசு மாதிரிகளை சேகரிக்க அந்த விறைப்பான குழல் மீதுள்ள ஒரு கருவியை பயன்படுத்தலாம்.

திசு ஆய்வு(பயாப்சி)

-புற்று செல்கள் உள்ளனவா எனக் காண்பதற்காக ஒரு சிறு திசுத் துண்டை அகற்றியெடுப்பது திசு ஆய்வு எனப்படுகிறது.

-வழக்கமாக, பொது அனஸ்தீஸியா கொடுத்து ஒரு விறைப்பான லேரிங்கோஸ்கோப் மூலம் திசு அகற்றியெடுக்கப்படும். பிறகு, ஒரு நோயியல் நிபுணர் நுண்ணோக்கி வழியாக அந்த மாதிரியை பார்வையிட்டு புற்று செல்கள் உள்ளனவா எனச் சோதிப்பார்.

-காணப்படும் இயல்பற்ற பகுதி உண்மையில் புற்றுக்கட்டியா என்பதை உறுதியாக அறிவதற்கு திசு ஆய்வு மட்டுமே ஒரே வழி.

-குரல்வளைப் புற்றுநோய் அருகாமை திசுக்களில் படர்ந்துள்ளனவா என்பதை அறிவதற்காக, மருத்துவர் ஒன்று அல்லது கூடுதல் பரிசோதனைகளுக்கு உத்தரவிடுவார்:

-நெஞ்சு எக்ஸ்-ரே
-சீடீ ஸ்கேன்
-எம்ஆர்ஐ ஸ்கேன்

-புற்றுக்கட்டியின் அளவு என்ன, குரல் நாண்கள் இயல்பாக அதிர்வடைகின்றனவா, புற்றுக்கட்டி அருகாமைத் திசுக்களில் படர்ந்துள்ளதா, புற்றுக்கட்டி உடலின் பிற பாகங்களுக்கு பரவியுள்ளதா என்பவற்றைப் பொறுத்து குரல்வளைப் புற்றுநோய் கட்டத்தை மருத்துவர் சித்தரிப்பார்.

குரல்வளைப் புற்றுநோயின் கட்டங்கள்

-ஆரம்பகட்ட புற்றுநோய்
கட்டம் 0, I அல்லது II குரல்வளைப் புற்றுநோய் வழக்கமாக ஒரு சிறிய புற்றுக்கட்டியாகவே இருக்கும்; நிணநீர்க் கணுக்களில் அரிதாகவே புற்று செல்கள் காணப்படும்.

-முதிர்நிலை புற்றுநோய்
கட்டம் III அல்லது IV குரல்வளைப் புற்றுநோய் ஒரு புற்றுக்கட்டியாக உருவாகி அருகாமைத் திசுக்களில் படர்ந்திருக்கும் அல்லது நிணநீர்த் திசுக்களுக்கோ உடலின் பிற பாகங்களுக்கோ பரவியிருக்கும்.

-அல்லது புற்றுக்கட்டி குரல்வளையில் மட்டுமே இருக்கும்; ஆனால் அது குரல் நாண்களை இயல்பாக அதிர்வடைய விடாமல் தடுக்கும்.

தொண்டைக்குழிப் புற்றுநோயை நோய்க்குறி அறிதல்

-தொண்டைப் பரிசோதனை
இந்தப் பரிசோதனையில் மருத்துவர் உங்கள் கழுத்தை தொட்டுணர்ந்து அதில் நிணநீர்க் கணுக்கள் உள்ளனவா எனக் காண்பார்; மேலும், வேறு ஏதேனும் இயல்பற்றதாகத் தோன்றினால் அவற்றையும் சோதிப்பார்.

-நேசோஸ்கோபி
மூக்கினுள் இயல்பற்ற பகுதிகள் உள்ளனவா எனக் காண்பதற்கான ஒரு நடைமுறை. நேசோஸ்கோப் மூக்கு வழியாக உட்செலுத்தப்படும். நேசோஸ்கோப் என்பது, நோக்குவதற்காக ஒரு விளக்கு மற்றும் லென்ஸ்(கண்ணாடி வில்லை) கொண்ட மெல்லிய, குழல்-போன்ற உபகரணம். திசு மாதிரிகளை அகற்றியெடுப்பதற்கான ஒரு கருவியும் அதில் இருக்கலாம்; இந்த மாதிரிகள் ஒரு நுண்ணோக்கி வழியாகப் பார்க்கப்பட்டு, புற்றுநோய் அறிகுறிகள் உள்ளனவா எனச் சோதிக்கப்படும்.

-நரம்பியல் பரிசோதனை
மூளை, தண்டுவடம், நரம்பு ஆகியவற்றின் செயல்பாட்டை சோதிப்பதற்கான ஒரு வினாக்கள் மற்றும் பரிசோதனைகளின் வரிசை.
இந்தப் பரிசோதனையில் ஒருவரின் மன நிலை, ஒருங்கிசைவு, இயல்பாக நடக்கும் திறன் ஆகியவை குறித்தும், தசைகள், புலன்கள், மற்றும் மறுவுணர்ச்சிகள் எவ்வாறு வேலைசெய்கின்றன என்பதும் சோதிக்கப்படுகின்றன.

-சீடீ ஸ்கேன்
வெவ்வேறு கோணங்களிலிருந்து உடல் உட்பகுதிகளைக் காட்டும் விரிவான படங்களின் ஒரு வரிசையை உருவாக்கும் நடைமுறை. எக்ஸ்-ரே எந்திரத்துடன் இணைக்கப்பட்டுள்ள ஒரு கணினியால் இந்தப் படங்கள் தயாரிக்கப்படுகின்றன. உறுப்புகள் அல்லது திசுக்களை மேலும் தெளிவாகக் காட்டுவதற்கு, சிரைவழி ஊசி மூலம் அல்லது வாய்வழி மருந்தாக ஒரு நிறமி கொடுக்கப்படலாம்.

-எம்ஆர்ஐ (மேக்னடிக் ரெசனன்ஸ் இமேஜிங்)
உடல் உட்பகுதிகளைக் காட்டும் விரிவான படங்களின் ஒரு வரிசையை உருவாக்க ஒரு காந்தம், ரேடியோ அலைகள், மற்றும் கணினியை பயன்படுத்தும் ஒரு நடைமுறை.

-எக்ஸ்-ரே
உறுப்புகள் மற்றும் எலும்புகளுக்கான எக்ஸ்-ரே எக்ஸ்-ரே என்பது, உடல் வழியாக ஊடுருவி உடல் உட்பகுதிகளை படமெடுக்கும் ஒரு வகை ஆற்றல் கதிர்கீற்று.

-பீஈடீ ஸ்கேன்
உடலில் தீங்கான புற்றுக்கட்டிகளை கண்டறிவதற்குரிய ஒரு நடைமுறை. ஒரு சிறிய அளவு ரேடியோ நியூக்லைடு குளுக்கோஸ் (சர்க்கரை) ஓர் ஊசி வழியாக சிரைக்குள் செலுத்தப்படுகிறது. பீஈடீ ஸ்கேனர் உடலைச் சுற்றி சுழன்று, உடலில் குளுக்கோஸ் பயன்படுத்தப்படும் இடங்களை படம்பிடிக்கும். அந்தப் படத்தில் தீங்கான புற்றுக்கட்டிகள் அதிகப் பிரகாசமாகத் தோன்றும்; ஏனென்றால், அவை அதிகத் துடிப்பாகச் செயல்பட்டு இயல்பான செல்களை விட அதிக குளுக்கோஸை உட்கொள்ளும்.

- எண்டோஸ்கோபி
இயல்பற்ற பகுதிகள் உள்ளனவா எனச் சோதிப்பதற்காக உடலின் உட்புறமுள்ள உறுப்புகள் மற்றும் திசுக்களை நோக்குகிற ஒரு நடைமுறை. கைமுறையான தொண்டைப் பரிசோதிப்பின் போது காணமுடியாத தொண்டைப் பகுதிகளை நோக்குவதற்காக நோயாளியின் மூக்கு அல்லது வாய் வழியாக ஓர் எண்டோஸ்கோப் உட்செலுத்தப்படும்.

-எலும்பு ஸ்கேன்
புற்று செல்கள் போன்று அதிவேகமாக பகுப்படையும் செல்கள் எலும்பில் உள்ளனவா எனச் சோதிப்பதற்குரிய ஒரு நடைமுறை. ஒரு வெகு சிறிய அளவிலான ரேடியோஆக்டிவ் பருப்பொருள் ஓர் ஊசி வழியாக சிரைக்குள் செலுத்தப்பட்டு, அது இரத்தவோட்டத்தில் நகர்ந்துசெல்லும். இந்த ரேடியோஆக்டிவ் பருப்பொருள் எலும்புகளில் சேர்ந்துகொள்ளும்; இதை ஒரு ஸ்கேனர் கருவியால் கண்டறியலாம்.

-பேரியம் ஈசோ·பேகோகிராம்
உணவுக் குழலுக்கான எக்ஸ்-ரே பேரியம் (ஒரு வெள்ளி நிற உலோகச் சேர்மம்) அடங்கிய பானத்தை நோயாளி அருந்துவார். இந்தப் பானம் உணவுக்குழலுக்கு மேல்பூச்சாக படர்ந்துகொள்ளும்; பிறகு, அதற்கு எக்ஸ்-ரே எடுக்கப்படும்.

- ஈசோ·பேகோஸ்கோபி
இயல்பற்ற பகுதிகள் உள்ளனவா எனச் சோதிப்பதற்காக உணவுக்குழலின் உட்புறத்தை நோக்குகிற ஒரு நடைமுறை. ஈசோ·பேகோஸ்கோப் மூக்கு அல்லது வாய்க்குள் நுழைக்கப்பட்டு தொண்டை வழியாக உணவுக்குழலுக்குள் செலுத்தப்பட்டும். திசு ஆய்வு செய்வதற்காக திசு மாதிரிகள் எடுக்கப்படலாம்.

-பிராங்கோஸ்கோபி
இயல்பற்ற பகுதிகள் உள்ளனவா என சோதிப்பதற்காக மூச்சுக்குழாய் மற்றும் நுரையீரலில் உள்ள பெரும் காற்றுத்தடங்கள் ஆகியவற்றின் உட்புறத்தை நோக்குவதற்கான ஒரு நடைமுறை. பிராங்கோஸ்கோப் மூக்கு அல்லது வாய் வழியாக மூச்சுக்குழாய் மற்றும் நுரையீரல்களுக்குள் செலுத்தப்படுகிறது. திசு ஆய்வு செய்வதற்காக திசு மாதிரிகள் எடுக்கப்படலாம்.

-திசு ஆய்வு
புற்றுநோய் அறிகுறிகள் உள்ளனவா எனச் சோதிக்கும் பொருட்டு ஒரு நுண்ணோக்கி வழியாக செல்கள் அல்லது திசுக்களை நோக்குவதற்காக அவற்றை அகற்றியெடுத்தல்.

- நாசிப்பக்க புரைகள் (சைனஸ்) மற்றும் நாசிக்குழிவு புற்றுநோயை நோய்க்குறி அறிவதற்கு பின்வரும் பரிசோதனைகளும் நடைமுறைகளும் பயன்படுத்தப்படலாம்

-உடற் பரிசோதனை மற்றும் வரலாறு
தலை மற்றும் கழுத்துக்கான எக்ஸ்-ரே
-எம்ஆர்ஐ ஸ்கேன்
-நேசோஸ்கோபி
-லேரிங்கோஸ்கோபி
-திசு ஆய்வு

-உமிழ்நீர்ச் சுரப்பிப் புற்றுநோயை நோய்க்குறி அறிவதற்கு பின்வரும் பரிசோதனைகளும் நடைமுறைகளும் பயன்படுத்தப்படலாம்

-உடற் பரிசோதனை மற்றும் வரலாறு
-எம்ஆர்ஐ ஸ்கேன்
-சீடீ ஸ்கேன்
-பீஈடீ ஸ்கேன்
-அல்ட்ராசவுண்டு பரிசோதனை
-எண்டோஸ்கோபி
-திசு ஆய்வு

-தலை மற்றும் கழுத்துப் புற்றுநோய் நிலையறிதல் செய்வதற்கு புற்றுக்கட்டியின் அளவும் அது நிணநீர்க் கணுக்கள் போன்ற உடலின் பிற பாகங்களுக்குப் பரவியுள்ளதா என்ற விஷயமும் கவனிக்கப்படும்.

-மருத்துவர் ஒரு குறிப்பிட்ட சிகிச்சையை செய்துபார்ப்பதா வேண்டாமா என்பதைக் கண்டறிய நிலையறிதல் உதவுகிறது

-தலை மற்றும் கழுத்துப் புற்றுநோய்க்கு 0 முதல் 4 (I-IV) கட்டங்கள் உள்ளன

-பொதுவாக, குறைந்த எண் உள்ள கட்டம் என்றால் குறைவாகவே புற்றுநோய் பரவியுள்ளது என்று அர்த்தம். உயர் எண் உள்ள கட்டம் என்றால் அதிகமாக புற்றுநோய் பரவியுள்ளது என்று அர்த்தம்.

www.magnahealthsolutions.com